Katër të vrarë në Loerrach të Gjermanisë me 20.09.2010..

Si pasojë e të shtënave me armë zjarri në një spital në qytetin Loerrach të landit Baden Wurtemberg dhe një shpërthimi që ka ndodhur më parë në një banesë, kanë vdekur katër persona dhe janë plagosur disa të tjerë. Hetuesia niset nga mundësia që këto vdekje i ka shkaktuar një grua në gjendje amoku për shkak të mosmarrëveshjeve bashkëshortore.

Pas shpërthimit në një banesë, ku janë gjetur dy trupa të pajetë, sipas të gjitha gjasave, burri i saj dhe fëmija i përbashkët, gruaja ka shkuar në spitalin e afërt ku me armë zjarri ka qëlluar përreth dhe ka vrarë një punëtor të spitalit, ndërsa ka plagosur disa të tjerë.

Prokurori i qytetit Dieter Inhofer tha se se në spital ka pasur të shtëna të shumta me armë zjarri dhe rreziku për të pranishmit ishte shumë i madh.

Pas ardhjes së policisë, gruaja e armatosur ka qëlluar edhe në drejtim të tyre dhe ka plagosur një nëpunës.

Gjatë shkëmbimit të zjarrit edhe ajo ka gjetur vdekjen.